新南苑私房菜 (已結業)

今日喺K11行完街，行咗過寶勒巷搵嘢食。見到有間新開嘅任食火鍋，就上去試吓。一入門口就俾個裝飾櫃吸引住，好多Marvel嘅玩具，超正，未食已經好感一百分。叫咗牛牛餐，先上咗一啲小食同埋蝦多士。跟住上咗刺身船，有驚喜，比想像中新鮮，鮑魚同蝦都好好食。再上一個酸菜魚，啲魚好滑，好得。火鍋湯底叫咗蟲草花花膠，清清地。跟住上咗個牛肉主菜，每一個部位都分得清清楚楚，知道自己食緊乜嘢。最好食美國和牛，其次係牛小排，牛頸脊同卦門柳就比較瘦，我太太就最鍾意。極上牛肉都唔差，不過有比較就梗係食和牛啦。雖然話係任食，其實食完上咗嘅菜，已經好飽。可能飲咗好多嘢，因為佢哋有個好大嘅雪櫃，好多好嘢飲。原來9:30後夜啲嚟再平啲，唔啱我依啲早瞓嘅，午餐都有平靚正任食，真係各有所需。