南島書蟲

營業中

休息中

訂錯索罟灣民宿，應該住榕樹灣較方便。每次都要搭出中環再搭回榕樹灣巿集，幸好60分鐘內完成。未肚餓食晚餐，走入迷宮一樣的橫街窄巷尋幽探秘。不經不覺廿十幾年無踏足南丫島，見住宅、小店、食肆都比當年為多，而環境壓迫感大了。逛到疲倦口渴體溫飈升，見有間茶座即衝入去歇歇。非常自助沒職員招呼，自己搵好位便走到櫃面落單比錢，再等候取餐。因為差不多要到目標餐廳 BB 海景餐廳晚膳，依家要忍忍口只點飲品吧！內籠裝潢家庭簡約式，算得上舒服，不過冷氣不太夠凍呢！青瓜雪梨汁，天氣酷氣要點清新不太甜不太膩的，依杯都係揀得非常恰當！青瓜味鮮而突出，搭著雪梨天然的甜，鮮撞甜不用添加糖水，狠狠大大啖吸啜，即時透心涼打通任督二脈！凍朱古力咖啡，奶泡實在過多，我要朱古力咖啡而不是泡沫咖啡啊！因為飲凍，冰會使味道變淡，所以奶味出而朱古力及咖啡味十分薄弱，平庸沒特別，解解渴可以的。