Dodam Chicken (利舞臺廣場)

營業中

休息中

本身舖頭好寬敞，好適合一大班人聚會，而今次同朋友坐嘅卡位亦都好闊落。本身店員好nice，會過來主動介紹菜色, 又會主動同我地傾計，好少會撞到咁好傾嘅店員。今次同朋友就叫咗部隊鍋、蜂蜜牛油蒜味炸雞同魚糕湯。部隊鍋咁凍嘅天氣就最適合食部隊鍋，本身部隊鍋都好足料，有腸仔、火腿、泡菜、金菇、拉麵、年糕同芝士，但本身唔算好食得辣，一開始都有啲驚個湯底會太辣，但食落又發現啱啱好！個湯底濃郁得嚟又唔會話太鹹同太辣，但又有泡菜嘅酸味，好好食！蜂蜜牛油蒜味炸雞本身有得揀炸雞有骨定冇骨已經好surprise，唔係間間食韓國嘢嘅都會有得咁揀。而本身炸雞個皮炸得好鬆脆，唔會話係硬柴柴，裏面啲雞肉好滑，再加上蜂蜜嘅甜味同牛油蒜味的香味，真係無得頂！再附送埋好爽口嘅醃蘿蔔，好啱食到有啲膩嘅時候食一兩粒去解膩。魚糕湯湯底清新得來亦會飲到昆布嘅味道，以為呢個魚糕湯都會好似平時韓國食到嘅只係得魚糕同蘿蔔，點知呢個魚糕湯勁多餸，又有蛋又有冬菇又有好多款唔同嘅都係用魚漿整嘅丸子，真係別有一番風味。