皇室冰廳 (已結業)

做節期間同屋企人講起兒時趣事，就挑起條筋，同阿哥一齊嚟重遊夠地。嚟到元州街，拍拍照，懷緬一下之後，就隨意搵一間餐廳坐低醫肚。呢間皇室冰廳門面光鮮，店舖細細，價錢又唔貴，喺門外見到嘢食都合心意，於是就入嚟坐低叫嘢食。我就揀咗鎮店特餐，係蕃茄濃湯烏冬，吉列炸豬扒配牛乳炒滑蛋。番茄濃湯真係好真材實料，係用鮮番茄熬製而成，仲有好多蕃茄肉，所以我食到連湯都清埋。滑蛋大概九成熟，仍帶一點點嘅蛋汁，炒得非常滑。炸豬扒炸得脆口又冇帶半點油膩嘅感覺，證明佢炸嘢嘅火候控制得非常好。豬扒厚薄適中，肉質鮮嫩，沒太多肥膏，啱晒我食。阿哥就揀咗焗飯，佢話貪佢有芝士，咁又真係焗得幾靚，仲有菠蘿同埋濃厚嘅蕃茄汁，飯係炒蛋飯底，真係唔使要雞扒都已經好好食，當然加埋雞扒就更加一流啦！加$5仲有熱飲，坐得舒服，價錢唔貴，真係給我一個好美好嘅回憶啊！