越翠苑

營業中

休息中

呢排嘅 社交平台回顧成日搞到我又病發😆，今日先同兩名豬朋狗友講起疫症過後要去越南食好西。未走得住，唯有喺香港搵啲越南嘢食下，慰藉一下心靈。呢間舊年 825 荃灣行街後已經想幫襯，不過嗰晚兵荒馬亂，九成食肆都關咗門，結果要等到上個月先至有機會去食。叫咗小店嘅名物蟹膏檬粉，一上枱就嚇咗一跳：成碗嘢嘅餸係出奇咁多，完全遮蓋住下底啲粉😮。蟹膏同我想像中嘅有啲出入，原先以為係好似蟹膏軍艦上面嗰啲鮮蟹膏，點知原來係熟蟹膏煎成嘅蛋餅，雖然鮮味有所不及，但係估唔到都幾好食；另外要讚嘅係嗰大大嚿嘅番茄，既新鮮又 juicy，超好味👍；其他餸菜仲包括豬紅，扎肉，豆卜同生菜絲。幹掉成碗已經好飽，點知我又 “貪心的小狗” 上身，唔捨得啲甜到入心嘅湯底，結果最後居然飲到見底😆，真係要畀啲掌聲自己👏👏。小店位處荃灣邊皮，我諗認識嘅人唔多，上次去嘅時候食客就非常少，雖然係咁，佢哋都有免費送口罩，絕對係良心小店。希望多啲人去支持下啦。