1
1
環境方面，當日因為早到，可以有靠窗位置坐，出面係瀑布流水景，都幾有意境，位置坐得幾舒服，不過就唔算得上好清幽，因為比較多人，不過就好乾淨同埋感覺幾典雅。
呢度嘅食物全部均係選用新鮮食材，低油低鹽低糖而且無味精，所以味道健康得嚟亦偏向清淡。
🔸陳皮欖醬蒸陳村粉：
係今次食嘅唯一一道覺得偏重味嘅菜式。陳村粉蒸得啱啱好，好滑。陳皮欖醬味道非常濃郁，味道偏甜，如果唔喜歡欖醬味道嘅朋友仔未必會喜歡。
🔸石菌豆腐煲：
豆腐裡面煮得好嫩滑，菇味好濃厚，而且份量都幾多，芡汁幾香，係平時豆腐煲嘅少鹽清淡版。
🔸素菜包：
餡料係素菜，驚喜在個包皮，蒸得好軟棉棉又好夠熱👍🏻
🔸香煎蘿蔔糕：
入口有一絲絲蘿蔔同埋少少香菇粒，外層煎得香口，裡面就偏軟綿綿。
🔸酥炸海苔卷 拼 香酥脆奶卷：
兩款均係炸得脆卜卜之餘得嚟又唔會油膩，不過脆奶卷就唔係好濃稠奶味嗰啲。
🔸石菌炒飯：
唔算炒得粒粒分明，但用嘅米粒好煙韌，好有嚼勁而且石菌味道幾濃郁。
呢度所有菜式味道都係相當平均，以清淡同自然味道為主，無添加太多味道，食返食材本來原本最純粹嘅味道，自己好喜歡，但如果重口味嘅朋友可能覺得味道偏淡，不過間唔中食可以當係清吓腸胃同埋洗滌吓，食完仲可以圍住南蓮園池行吓，睇吓羅漢松樹等景色，都係俾自己同屋企人放鬆嘅好時機👍🏻。
