佢就係登打士街後一條街，都幾易搵到，
6:30pm去到，仲有唔少空位，見到menu上面有個套餐，
我地兩個人都可以嗌到，就決定點呢個餐。
2
點完餐之後就有前菜食，有柚子沙律同鮑撈起手撕雞。
柚子沙律酸酸地好開胃，手撕雞撈左麻醬好惹味！估唔到前菜都咁好味！
首先黎既係飲品，佢呢到有得揀自家製既紫貝天葵，
我同朋友都即刻揀呢款飲品！飲落酸酸甜甜，好健康！
套餐可以俾我地揀兩款湯底，中間再送清酒煮蜆螺，
我地就揀左比較少有既雪山飛龍鍋同東方美人鍋。
相中左面既係雪山飛龍鍋，即係蛋白球配龍躉魚湯，飲落好鮮甜！
我係第一次食蛋白球，岩岩滾起時食就好似梳乎厘咁，滾耐D口感會變厚實，幾得意！
而右面既東方美人鍋就有竹絲雞同桃膠，仲有雜菌、杞子、紅棗、娃娃菜，
材料豐富，感覺好滋補，好岩女士們天寒地冬既時候飲黎補身暖胃。
中間既火焰清酒煮蜆螺雖然比較細隻，但由店員即場係客人面前加酒燒，叫做有得睇又有得食。
套餐另外包一個時令海鮮拼盆，可以係龍躉片、帶子、鮮海蝦、蟶子皇、鑽石蜆、刀貝、
花甲王、脆鯇片、東風螺入面揀！我地就揀左脆鯇片、海蝦、龍躉片及蟶子皇，
全部都好新鮮，我自己最中意食海蝦同脆鯇片！
肉類方面，每兩位就可以揀一碟，選擇有手切頂級安格斯牛頸脊、日本松坂黑豚肉配小黃瓜，
仲可以加$20/位叫焱手切封門柳或加$38/位叫焱選手切Prime肥牛。
我地係唔洗加錢既前提下叫左手切頂級安格斯牛頸脊，
牛肉既雪花紋分佈好靚，佢一上枱個下我地都即時流口水！
每片都切得好薄，輕輕滾兩滾就已經食得，牛味濃郁，肉質鮮嫩，絕對係我全晚既至愛！
手工火鍋拼盆賣相好精緻，好似去飲茶食個D點心咁，
入面有太極蟹籽海鮮軍艦、鮮蝦雪條棒、牛肝菌黑松露餃子、
手打安格斯香辣牛丸同三層樓墨魚磚，款款都好有心思。
我覺得最好味既係手打安格斯香辣牛丸，手打牛丸好彈牙，而且牛味香濃又有辣勁！
另外亦都要讚讚佢既即炸響鈴卷，份量多，食落又唔覺油膩，
浸一、兩秒湯再食味道一流，就算擺左係到一段時間再食都仲係脆卜卜！
佢仲跟一個時蔬籃，俾各位貪靚女士可以食得健康，
最後仲送上芒果布甸，食飽飽仲有甜品，真係一個完美結束啊！
