泰玖 (已結業)

今日同朋友嚟咗荃灣曹公坊嘅泰玖食泰國菜，餐廳樓高兩層，空間感大，裝修係偏向工業風，座位都有隔板隔住，幾啱同朋友傾偈。我哋嗌咗泰式串燒雞、牛、豬各兩串、金不換炒鮮蝦河粉、蒜香炒泰國椰菜苗同菠蘿活性乳酸菌思樂冰。泰式串燒配嘅沙嗲醬有花生嘅粒粒同香味，d串燒肉燒得唔算乾身。金不換炒鮮蝦河粉喺乾炒河粉，金不換做香料所以帶出少少香辣味，鮮蝦爽口彈牙，配料有三色椒、粟米仔、洋蔥、芽菜同香葉，成碟河粉都香氣撲鼻，乾炒得嚟亦都有少少芡汁令到河粉好滑身。蒜香炒泰國椰菜苗芡汁帶有少少甜味，椰菜苗嫩滑同埋吸晒啲汁，炸蒜亦都好香口。杯菠蘿特飲係加咗益力多嘅菠蘿沙冰，入面有菠蘿粒粒，酸酸地好開胃。呢間餐廳嘅CP值好高，價錢合理，份量足夠，睇到Menu見到佢哋仲有做幾抵嘅午市套餐，大家嚟開荃灣可以試吓！📍荃灣曹公坊5號地舖位置就腳：🍊🍊🍊🍊🍊餐廳環境：🍊🍊🍊🍊食物味道：🍊🍊🍊🍊🍊整體CP值：🍊🍊🍊🍊🍊