豐生水起 (已結業)

自己住土瓜灣，平時好少有機會入大埔，今日咁啱入去朋友屋企玩，佢哋安排晚飯落嚟呢間火鍋店食，於是就試到聞名已久嘅花膠雞湯火鍋。首先叫咗啲前菜食下先，我好鍾意呢個紫菜墨魚餅，佢唔會有厚厚嘅粉漿，所以非常之香脆，墨魚同紫菜混合嘅味道好惹味，食得好開胃。然後朋友勁推薦呢個黃金炸魚皮，極度邪惡呀！好多蛋黃，魚皮大大塊，新鮮炸起，好熱氣但好好味。老闆娘再介紹咗另一個小食，叫陳廚羊肉串，聽個名就知道係招牌菜，我好鍾意食羊，食咗一啖就知道係我喺大陸啲串燒店食開嘅好味道，落足好多香料所以羊肉完全唔羶，但唔食得辣嘅朋友就覺得有啲頂唔順，我就覺得啱啱好，正。食完前菜，就開始打邊爐。一上呢個湯底，大家都好期待，見住佢成隻大黃雞倒入個湯就知道足料。正式打邊爐之前，我地每人飲一碗湯先，一入口就知道個湯真係滿滿嘅骨膠原，真係好啱女士們。火鍋料方面，除咗打邊爐一定有嘅手切肥牛，仲有好多呢度特製嘅各種水餃雲吞，全部賣相都好吸引！然後我哋仲叫咗個海鮮拼盤，樣樣海鮮都好新鮮，鮮甜美味。今晚呢餐晚飯真係好正，我地幾個食到好滿足，下次再嚟大埔要食多次先得。