Good Times Restaurant And Bar (已結業)

星期六加班，lunch出黎聯和墟食，試下新開的西餐廳先。Lunch menu好多選擇喎，睇到有野啱食就食佢啦。入到餐廳，嘩，好大呀，仲好高樓底，空間感十足，感覺唔錯喎。二點來到都幾乎全場滿座，好有人氣呢。店員很快便送上水及餐牌，有效率！午餐有餐飲送，冷熱同價。朋友要了凍檸茶走甜，自己要了凍朱古力，香濃朱古力味又不太甜，凍凍的幾好飲。午餐不包餐湯，要另加錢的，是日係雜菌湯，滿滿的菌香，杰身夠creamy，幾好味。附送的餐包，是蒜香多士，夠脆又香口。朋友點的芒果煙鴨胸沙律配蜜糖芥末沙律汁，顏色好靚呢，哈哈，紅紅黃黃好有夏天色彩。芒果很甜，沙律菜新鮮，作為輕盈的午餐很不錯。自己點了板煎三文魚柳配黑松露忌廉汁，厚厚的三文魚附上一大堆薯蓉，還有少量蔬菜，賣相靚靚之餘亦夠飽肚。三文魚扒要了七成熟，外皮煎得香脆魚肉粉嫩，入口充滿彈性，滿滿的魚油甘香十分出色，加上香味濃郁的松露汁更添層次，正！順帶一提，午市不用加一的。