海饌 - 海鮮牛扒餐廳 (Fashion Walk) (已結業)

約咗好耐冇見嘅閨蜜食晏，朋友鍾情西餐，上網見有人推介 Fashion Walk 嗰間「海饌-海鮮牛扒餐廳」，環境幾有情調，一於訂檯試下。餐廳設有室內和戶外座位，裝修以歐陸風為主，設計崇尚簡約自然，灰白磚牆配以黑色格仔窗，氣氛輕鬆，好適合同朋友嚟聚餐。意大利布拉達芝士有機雜錦番茄沙律 ($145)  芝士質感柔軟，入口化出奶香，味道溫和清新，配上幾款唔同嘅有機番茄，食味酸甜富層次，用來做前菜非常適合。西班牙黑毛豬風腿卷 ($130)  Croquette有 4 大粒，外層炸至金黃香脆，內裡包住鹹香嘅黑毛豬火腿同 creamy 細滑嘅薯蓉，以旁邊嘅無花果伴吃，消脂又解膩。香蒜橄欖油浸墨魚片 ($135)  墨魚片厚身爽彈，份量超多，入口帶濃郁墨魚鮮味，沾上充滿蒜香味嘅橄欖油同蒜片一齊食，非常惹味可口。燒阿根廷牛薄裙肉配布拉達芝士及阿根廷青醬 ($340)  阿根廷牛薄裙肉肉質超香嫩，肥瘦比例啱啱好，食落牛味好突出，油脂適中，肉汁滿滿，配綿密軟糯嘅 Burrata cheese 同微酸微辣嘅阿根廷青醬吃，真係冇得輸。