葉公館 (已結業)

今日收工同同事喺舖頭附近食飯，知道公司附近開咗間粵式川菜，今晚特登去幫襯吓。葉公館 地址喺長沙灣青山道255號恆輝閣一樓。餐廳外面招牌好吸引，望落去金黃色襯托白色字，遠遠嘅距離都見到，入到去餐廳幾乎已經坐滿晒客人。西蘭花炒鮮魷 賣相相當吸引，望落去色澤鮮艷。鮮魷味道非常鮮甜，食落去爽口彈牙，一食就知道鮮魷好新鮮，魷魚嘅香味係口中慢慢爆發。西蘭花同三色椒亦都炒到好香，將鮮魷嘅鮮味吸收咗，無論口感同味道都做得好出色。薑蔥魚雲煲， 108元，一上枱已經聞到好香嘅味道，將薑蔥爆香味道完全融入魚肉入邊，非常入味。魚雲嘅肉質好香好嫩滑，味道鮮甜。食落去一疏疏嘅魚肉配上香蔥味道層次更加豐富，鮮味更加突出。真係色香味俱全。蝦球外皮炸到好酥脆，入口脆卜卜味道又香，入邊嘅蝦肉仲係好爽，好彈牙，味道好鮮甜。一啲都唔會有油膩嘅感覺。呢個蝦球用嚟送啤酒真係一流，香脆鮮甜，味道層次分明。食到咁好味嘅餸，即刻點返支藍妹，真係爽到爆。