南記粉麵 (新都城中心二期)

營業中

休息中

放假多數都會瞓晏啲，起身已經skip咗早餐🤣又係時候揾食喇。見成日都係食譚仔，悶悶哋想食其他嘢。學佢話齋，食得好心情好...心情好就應該香港都好嘅😅我叫咗個雙拼酸辣米線，覺得好味咗，之前食酸辣唔似酸辣咁，今次做到嘢😋春卷係佢哋嘅招牌，味道係唔錯㗎，魚肉彈口，但個人問題，我每次食食吓就會有膩嘅感覺，唔知係咪太油呢，一碗有兩條，我最多食到一條就頂唔住😅結果俾咗老公食，盡量唔浪費食物㗎😎魚腐都係我鍾意嘅粉麵配菜，有啲地方嘅魚腐望落大粒但實際用料少，咬落口有啲空心得誇張，但呢度唔會。好欣賞呢度嘅米線，比起譚仔，我鍾意呢度多啲，幼身啲，食落好滑口，每條都掛住晒酸辣湯嘅味。仲叫咗杯仙草奶茶，見套餐加$5就有咪試吓囉，都幾抵飲，原價要$15㗎。我呢個唔係套餐，但係老公叫咗套餐所以有呢個優惠。我覺得奶嘅比例較多，唔係我杯茶😜不過仙草幾好味。老公叫咗Set A，俾咗件冬菇我試，好大隻好厚身喎，好似平時炆嘢嗰啲咁，幾香。