章記香港仔魚蛋王

營業中

休息中

牛腩麵走蔥，一上枱見到啲牛腩好靚喎 ﹗湯就多左啲，不過唔會影響味道既，只係賣相扣點分數。湯麵當然係試左個湯先啦，依舊滷水牛味濃郁，忍唔住連飲幾口，希望食完唔會太渴就好喇。夾舊牛腩試試先，先發現原來都幾肥吓，肥膏跟瘦肉相間，雖則話牛腩唔肥就唔滑唔好食，但我接受唔到咁肥喎。食落都好入味，口感軟棉嫩滑，但對我黎講真係肥左啲。麵失手了，唔怪得今日等耐左啦，麵質過腍，唔夠爽口彈牙喇。嘩 ﹗又加左價喇 ﹗之前 HKD18、跟住 HKD19，轉個頭 HKD21 ﹗人工都無一年加兩次啦 ﹗魚蛋麵走蔥，魚蛋真係好味左喎，爽口有魚味 ﹗魚片、紐紋魚片同樣出色，麵都烚得烚到好處，夠爽口，但係個湯就真係太淺口，又係辣椒油出黎救命既時候喇 ﹗牛腩河走蔥，湯底加埋個河粉突別淡口，試下加啲醋會唔會好啲啦，有醋味好好多。牛腩勁多肥膏，但瘦肉位又勁鞋，香港仔最好食都係牛什啦。雲吞伊走蔥，試試新口味，食個雲吞先。伊麵好似特別少咁，咬兩啖無晒既。伊麵質地嚥靭，無烚過火，都幾好食。雲吞大路，唔過咸、蝦爽口、豬肉味濃，合格。