金鳳大餐廳

營業中

休息中

終於都嚟到成日都排晒隊嘅金鳳大餐廳，嚟到屯門分店，門口已經好有懷舊嘅風味。係經典港式鐵板餐嘅味道丫。我哋叫咗兩個餐，帶子牛柳鐵板七成熟，另一個係西班牛扒🥩。落咗單2分鐘咋，已經嚟咗餐廳餐包同餐飲。一貫香港嘅特色就係，快丫。首先講一下個餐包配羅宋湯，暖笠笠嘅餐包，加上一Pat嘅牛油🧈，牛油因為餐包嘅熱力開始慢慢地溶化。呢個時候將佢點羅宋湯嚟飲，簡直係一流！ 話咁快，湯都未飲完。牛扒已經到了😂嚟到最精彩的部份，蒜蓉汁淋上牛扒上面，喺牛扒嘅下面就係熱辣辣嘅鐵板。蒜蓉汁撞上熱辣辣嘅鐵板時候。睇住啲煙升上嚟嘅感覺，即刻童年回憶返晒嚟。仲記得細個嘅時候逢親生日屋企人就會帶我哋去食港式嘅鐵板餐。而家大個咗去西餐廳食牛扒餐都冇咗啲一種鐵板嘅氣氛了。港式鐵板餐最經典嘅就係，大大塊嘅牛扒，配上薯條，瓜菜。當然牛扒唔可以同高級餐廳嘅牛扒比，但係佢勝在夠大件夠抵食丫嘛。另外今次佢嘅帶子真係有驚喜，又大粒又好食。