飲茶 (已結業)

上次去左旺角分店, 由於係food court隔離所以隔唔到油煙, 環境一般。今次去尖沙咀分店, 環境好好多, 雖然因為空間較細, 枱與枱之間都幾迫, 唔算坐得好舒服, 但起碼唔會好似旺角聞住隔離嘅鐵板油煙食飯。由於朋友第一次去, 所以緊係循例要食得意嘅點心。以下幾樣都好味, 睇得又食得, 最鍾意睇住流奶有好香咸蛋黃味~除左呢D預料之內嘅可愛點心, 估唔到最大驚喜竟然係睇落唔特別嘅野菌泡飯!!上菜時侍應先會將炸過嘅飯粒倒入口湯入面, 食落口感同味道都不得了。卜卜脆嘅飯粒配上清甜嘅什菌湯底好夾, 好好食。最特別嘅一定係口感, 因為一般泡飯都係普通軟淋淋嘅白飯, 係呢度嘅會炸過所以先咁好食。見到好多人推介, 係幾好食嘅。不過價錢就唔多值, 百幾蚊一碟菜, 都係試一次咁大把算了。果然健康係要付出代價...呢個醉雞我都好鐘意, 唔似外面食到嘅咁重酒味, 滑嫩雞肉配上醬料好易入口。粉皮彈牙, 口感唔錯。豆腐滑嫩, 睇落都好靚, 但同上面其他有特色又好食嘅菜式比較下就略為遜色。下次再食嘅話, 都一定會再叫野菌泡飯!因為呢個真係估唔到咁好食。