CoCo Espresso (已結業)

因工作關係，黎到大埔超級城附近，唔太肚餓又想飲咖啡食少少野，咁就去coco睇下。平日中午唔太多人再加上未到午市時間，到我走嘅時候就開始多人。餐廳環境上大家可以看圖識字，我都唔打算形容太多，都係白色底襯木枱凳之類。今次兩個人就叫左煙豬面頰卡邦尼短管意粉 (Carbonara Rigatoni Pasta) 、紅酒燉牛面頰配薯蓉 (Braised Beef Cheek)再加杯flat white同iced mocha（無影相）。唔知幾時開始多左地方有得食短管意粉，我最初見到個名擔心會係港式白汁卡邦尼，好彩唔係，一出黎見到係接近傳統卡邦尼做法，個心都定啲。煙豬面頰用左半煎炸方式處理，成個pasta充滿油香再加埋蛋黃香。一般黎講短管意粉中間通窿，都會令人有一種volume大但係食落有少少空虛嘅感覺，好似食空心薯條咁。不過今次嘅份量適中，當然大胃王就另計啦。牛面頰都煮到好稔，第一次接觸牛面頰係大埔墟嘅某間清湯腩（已結業），食過一次就愛上，當然中西式煮法會有唔同風味。薯蓉方面都有少少配菜，車厘茄、白蘑菇同埋羽衣甘藍，令本身單調嘅薯蓉增添一點色彩同層次。