十十川滬料理 (已結業)

今日喺朗豪坊行完街，俾我發現一間唔錯嘅川菜餐廳，要介紹吓俾大家。餐廳位於朗豪坊food court果一層，門面有啲難睇到，比我同朋友誤打誤撞入咗去食晚餐，又幾有驚喜。餐廳每一日都會做唔同主菜嘅半價優惠，如果啱食都幾抵食。點咗個前菜萵筍絲，雖然係清炒，但係都好惹味，做前菜一流。例牌口水雞，雞肉十分滑溜，冇太多骨，而且例牌其實都幾大碟，幾抵食。主菜點左辣子雞，雞肉雖然有炸過，但唔會揸到乾爭爭，或令到雞肉鞋颯颯。落咗好多辣椒同配料，食落非常惹味，仲有蠟燭熱住，唔會好快涼咗。另外香辣小籠包都幾特別，入邊用咗麻辣嘅餡料。最後要讚吓佢嘅養生，合桃酒釀丸子，平時川菜甜品都會食糍粑，但黎依家一定要食合桃酒釀丸子，識落非常清甜，有少少甜酒味道，食完麻辣再食呢個甜品一流！