Be Leaf (已結業)

觀塘區出名多嘢食，放工剛好經過呢間裝修好有特色嘅餐廳，就即管入去試吓。蒜香牛油聖子配蒜蓉包：香濃嘅蒜蓉包配上大大件嘅聖子，一道開胃，觸動味蕾嘅前菜。香脆酥炸雞翼：香脆而保留到肉汁外皮炸粉唔會太厚，配上芥末醬，每啖都係邪惡嘅滋味。軟殼蟹溫泉蛋芝士忌廉意粉：芝士配上忌廉，比起前菜更加邪惡。每一啖意粉都好creamy同濃郁，意粉嘅軟硬度適中，配上溫泉蛋減少肥膩感。軟殼蟹份量都頗大，十分有誠意。香芋特飲：萬聖節限定嘅飲品，香芋味濃郁，亦唔會太甜。難得放縱一次當然都唔會走cream啦。黑芝麻咖啡：萬聖節嘅特限定飲品，拉花又幾鬼馬。黑芝麻杯咖啡又估唔到幾夾，不妨試一試。最後當然係甜品啦，為呢一餐畫上完美嘅句號。焙茶巴斯克微焦芝士蛋糕，焙茶味香濃加上微微燒焦嘅表層令芝士蛋糕嘅味道更加昇華。整體而言，餐廳嘅地方鬆動，富有特色，令人放鬆。食物嘅質素唔錯亦都對得住價錢，性價比高，值得一試。