今次難得約左個都係好中意食抹茶既朋友，就帶左佢一齊食宏喇😆
舖頭佔左好大個位置，除左好多位之外，仲好闊落。座位亦都超級舒服，坐到我地唔願走😝
呢啲就係部份既餐牌，我地就叫左一個飯餐一個烏冬餐。兩個餐都係可以配一個小蛋卷同一杯茶既～
首先黎既係野飲，我地一個改配左抹茶牛奶，一個就飲果日既茶，伯爵茶。
抹茶牛奶一遞上黎既時候已經聞到好香既抹茶味，侍應仲好貼心咁叫我撈勻啲先飲，廢事啲粉未溶曬。一飲落口，真係好濃抹茶味，可惜既就係太細杯，唔夠喉😭
至於伯爵茶就係沖茶包既，都好好味。我自己就食伯爵茶既甜品比較多，但伯爵茶本身就少飲，其實伯爵茶就咁飲同整成甜品陣味都幾唔同架，大家不妨試下～
兩個餐都有配前菜，係沙律嚟嘅，入面有車厘茄、粟米，同埋生菜，啱晒鍾意食沙律嘅我
生菜好爽口，好新鮮～配上柚子醋汁高更加開胃
至於烏冬餐就多兩個加州卷，正呀
跟住就到主菜喇～
我地嗌左生姜燒飯，豬肉好入味，又唔肥，又配左好多好多洋蔥，正
至於佢啲烏冬，就唔係一般我地食開果隻白色嘅烏冬，質感似蕎麥麵，原來仲係餐廳自家製架添
我地嗌既呢個係醬油海藻烏冬麵，配埋厚身既叉燒
餐廳仲好貼心咁附上埋七味粉，比顧客按個人喜好加
只要加$30就可以升級成1.5倍既麵量，相當抵，不過其實相中果個size對於我黎講都好夠喇
我地既餐跟左抹茶蛋卷～呢度最出名既就係呢個，點可以唔試呢？
蛋糕鬆軟不在話下，蛋糕同抹茶忌廉仲好香抹茶味。size都唔細架，份量十足
不過區區一個蛋卷又點樣止得住我地個甜品胃丫～所以我地仲叫左2個芭菲
都講咗呢度最出名嘅就係抹茶甜品，叫芭菲當然都要叫個抹茶軟雪糕芭菲先啦～
好足料，由上至下有脆餅、抹茶雪糕、抹茶mochi、抹茶啫喱、cream、custard、海綿蛋糕、粟米片，而個醬就係類似煉奶既味既～
個頂已經有咁多層抹茶味既野，令到成個甜品都好濃抹茶味，岩曬抹茶既擁躉
提外話，每次食芭菲，都會好想可以一條羹插落去食晒每一層嘅材料，但係每一次都失敗，唯有逐樣逐樣野食
第二個就係焦糖布甸芭菲～同抹茶芭菲一樣，上面都插左塊脆餅。雪糕就係呍呢拿味既，喺布甸既上面鋪左層餅碎，更加有口感。
下面就有士多啤梨醬、忌廉、海綿蛋糕，同粟米片。
另外每一張枱都有一個咁樣嘅呼叫制，方便叫店員過黎。好多餐廳都要禁幾次先有人過黎，但呢度既員工一聽到就會即刻過黎，相當有效率
店出面仲有蛋糕外賣，價錢都唔貴，趕時間或者唔想坐喺餐廳入面食既就岩曬～
總括而言，宏既食物水準相當高，座位又舒服，價錢絕對值。而且因為食物種類好多，唔止適合抹茶fans，對抹茶冇咩好感既都不妨試試
