影片
更多
2005-08-30
93 瀏覽
當然如果環境可以當食物咁食埋落肚，呢度一定正到不得了！要招呼幾位外賓，但開完會都已經八點幾，出面落幾大雨，就放棄了原本行過蘇浙的念頭，來了這裡。勝在由IFC行過來唔使打傘，同埋地方幾好，雖然食物麻麻，但幾個北歐妹/佬，有幾識食？照計勝任有突。呢度環境一項沒話可說，是不錯的，包括檯上的餐具也是名古屋餐具名牌，不簡單。不過依我看，還不至於滿分，裝修後係美觀左，但因為檯擺得密，人客多的時候，其實都幾嘈吵，如是晚full house，就是一例。一行六人，除了我及靚女同事，看噸位都知是吃得的人，就叫多幾味。前菜冷盤要了海哲頭、醉雞、素鵝、雞絲粉皮及鹵水鴨舌，砂窩雲吞雞、熱盤是烤鴨、炒鴨絲、松鼠黃魚、蔥爆羊肉、乾煸四季豆，單尾是三鮮燘拉麵、窩貼、小籠包、什錦炒飯及蔥油餅，之後還有甜品，食到佢地叫停為止。這裡的前菜是細細碟的，所以都不用擔心會叫得太多。海哲頭不是靚貨，是次一級的海哲頭，吃落雖然爽脆，但只要吃過利苑的就知這裡只是一般。汁調得太甜，似甜品多過似頭盤，唔掂；醉雞是好多地方有得食，但又好難吃得有好的一味。這裡的都是一般，酒下得太狠，完全蓋過雞本身的味道，雖然雞肉幾嫩滑，卻也不是一個出色的醉雞
要招呼幾位外賓，但開完會都已經八點幾，出面落幾大雨，就放棄了原本行過蘇浙的念頭，來了這裡。勝在由IFC行過來唔使打傘，同埋地方幾好，雖然食物麻麻，但幾個北歐妹/佬，有幾識食？照計勝任有突。
呢度環境一項沒話可說，是不錯的，包括檯上的餐具也是名古屋餐具名牌，不簡單。不過依我看，還不至於滿分，裝修後係美觀左，但因為檯擺得密，人客多的時候，其實都幾嘈吵，如是晚full house，就是一例。
一行六人，除了我及靚女同事，看噸位都知是吃得的人，就叫多幾味。前菜冷盤要了海哲頭、醉雞、素鵝、雞絲粉皮及鹵水鴨舌，砂窩雲吞雞、熱盤是烤鴨、炒鴨絲、松鼠黃魚、蔥爆羊肉、乾煸四季豆，單尾是三鮮燘拉麵、窩貼、小籠包、什錦炒飯及蔥油餅，之後還有甜品，食到佢地叫停為止。
這裡的前菜是細細碟的，所以都不用擔心會叫得太多。海哲頭不是靚貨，是次一級的海哲頭，吃落雖然爽脆，但只要吃過利苑的就知這裡只是一般。汁調得太甜，似甜品多過似頭盤，唔掂；醉雞是好多地方有得食，但又好難吃得有好的一味。這裡的都是一般，酒下得太狠，完全蓋過雞本身的味道，雖然雞肉幾嫩滑，卻也不是一個出色的醉雞，須知不是酒味重才是醉雞！海哲頭太甜，素鵝就唔夠味；最好的要算一味鹵水鴨舌，鴨舌雖一定不是新鮮貨，味道全靠鹵水，這裡也做得不錯；不過無論太甜太多酒或唔夠甜，班鬼都唔係好食得出，這就是來這裡的好處；
食完冷盤，大家都在等熱盤上，但等來等去等不到，連拉麵表演睇埋都未有得食。催促了一次，第一味來的，竟然是什錦炒飯！沒道理什麼不吃就吃炒飯先，厲了傳菜的阿姐一眼，她立即將炒飯拿回蓋著。誰不知呢頭拿回，果頭又拿個四季豆來，見此情況，當然捉個部長來訓示一下，之後才一切正常。有此情況，服務一項，難免扣一分。
先來雲吞雞，份量偏少，一人一碗，大半碗湯及一隻餛飩，就什麼也沒有得剩。為免寒酸，當然立即叫多一煲。味道算是鮮甜，餛飩就一般水準；烤鴨送來，有一師傅在片皮，幾有功架，當然又係鬼佬的最佳節目。預先叮囑要隻廋一點的，果然不肥，烤得皮脆又豐腴美味，都有水準。這味烤鴨，都算食得過；一鴨另吃的炒鴨絲就麻麻地，始終烤完又炒，係一般左d；松鼠黃魚又係另一味「鬼佬佳品」，酸酸甜甜的炸魚，賣梳又相當精緻，他們是沒有抗拒的理由。吃了一口，雖然幾甜又不太酸，都算食得過；蔥爆羊肉就水準以下，皆因羊肉炒得太乾太鞋，完全唔係路；乾煸四季豆長長的，賣相一般。味道雖不差，但可以做得精緻一點；
吃完熱盤就是飯麵等等，一早蓋住的炒飯當然要快吃，炒得幾香，但就略縑油膩一點，碟底有不少油跡；三鮮拉麵幾爽身，麵質不錯，但炒得太鹹，不及格；窩貼煎得底部香脆又有肉汁，是有水準的一味，鬼佬出埋手去食。一客6隻，結果再叫多一客；小籠包乾身了一點，吃落有肉質，肉餡鬆軟，都不錯。不過一客4隻，又係要叫兩客至夠食；蔥油餅炸得太乾身，當脆餅食可以，送啤酒都不錯，但就不是有水準的蔥油餅；
吃到甜品，其實大家已經飽得七七八八，所以只叫了高力蛋白豆沙香蕉及拔絲蘋果。兩樣都是水準之中，高力豆沙新鮮熱辣，漲鼓鼓的，只不過蛋白不夠鬆軟，有點實；拔絲蘋果用上了玉泉忌廉，當然比凍水高級不少。不過個糖漿面做得太厚，實的的，是廚房功力的問題。
侍應的服務是好得不得了，人手充足，亦眉精眼企。見靚女同事怕凍，縮下縮下咁，就主動的幫佢調位，亦有跟進情況，值得一讚。
自紅白酒各一支，加埋啤酒汽水，埋單二千四百幾，鬼佬食得相當滿意，都算物有所值。
題外話一：如果追求環境服務的話，選這裡是沒話可說。但如果論京菜質數的話，比這裡好的京菜館比比皆是，這裡只是集團式京菜水準，絕對不算出色；
題外話二：如同西人食飯，這裡一定令佢地滿意，因為照計佢地食咩都好食。所以今次個OK面係比個應酬宴會的，如果自己來吃，加埋價錢，會比個喊面佢；
題外話三：開瓶費每支二百，唔平，所以平酒就無謂帶來開。
張貼
