焱丸水產 (已結業)

又開始我嘅美食之旅啦，今日去咗銅鑼灣謝斐道440號的焱丸水產食晚飯。 招牌燒蟹蓋真係好好食。 香噴噴嘅蟹膏，入口濃滑，味道鮮甜，口感一流。但係好明顯膽固醇一定好高， 除了有蟹膏之外亦都有鵪鶉蛋。 但真係好好味，好想叫多份。薯仔沙律就有一點失色因為薯仔好硬完全唔係薯蓉。左口魚和海螺嘅刺身好新鮮。 清甜可口。我叫了清酒煮蜆， 這個一般，因為個清酒底真係清到淡而無味，個蜆煮得太熟。但係有個侍應介紹我食燒蜆， 果然真係好好味! 又鮮甜並且肉質又肥美。真係一流嘅享受。 一定要食。水葡萄好新鮮，當菜食好好味。炸雞雖然味道欠缺一啲咸味但係雞肉也非常之Juicy。我要讚一讚這裏的服務，雖然有新人做侍應，有時不知所措，但是舊人非常有禮貌又健談。感覺非常好。原來最好去嘅時間係星期日至四晚上，今天是星期五幸好我攞到一個位，但係在餐廳外排的龍實在太長啦。總結我一定會再來這間餐廳， 自己嚟食飲下啤酒食下燒烤或者同朋友來也是一個好地方。 佢哋開到凌晨兩點鐘，可以飲酒食燒烤，真係好地方。