點心堂

營業中

休息中

火炭D餐廳轉手轉得好快，今次黎左呢間新開嘅點心店，佢嘅裝修風格同點心完全扯唔上關係，唔睇MENU仲以為係西餐廳。雖然點心款式唔多，不過勝在所有點心上枱果陣都熱辣辣，其中都有D值得一試嘅點心。值得推介嘅點心有：升哥蝦餃皇 $31同平時茶樓嘅分別，在於入面嘅餡，全部都係蝦肉，唔會食到豬肥膏，而且餃皮都幾薄。班蘭馬拉糕 $28完全無諗過真係有班蘭味，雖然佢個密度比普通馬拉糕高，食落似蒸蛋糕多，夠濕潤，而且有少少入口即溶嘅感覺🤤。餐廳有特色嘅點心：鐵板生煎包 $27上枱果陣鐵板不停發出”吱吱”聲，雖然肉餡同味道同普通生煎包無乜分別，不過我真係第一次食到咁熱嘅生煎包。紫薯流心球 $29外面有一層薄脆皮，第二層軟林林有D似鹹水角皮，個餡比流沙奶黃包更流心，係一件十分邪惡嘅點心。西紅杮春卷 $26春卷餡除左有蕃茄外，仲有蝦、比例較多嘅菜。由於蕃茄比例唔多，味道亦唔特出。普普通通嘅點心：醬皇蒸鳯爪 $21我唔食鳯爪，所以無評價。沙爹金錢肚 $26個人比較中意食牛肚淋得黎仲帶點彈性，但呢度個牛肚炆耐左少少，無左彈牙口感。薑蔥牛柏葉 $26我麻麻地佢個調味，除左薑絲外，好似加左蒜蓉，個人覺得個味唔係咁搭。