拾味正宗刀削麵館 (歌賦街) (已結業)

今日係中環呢頭做完嘢，時值中秋佳節，未有耐食晚飯，就想搵間麵店平平地食個下午茶啦，平時米線就食得多，見有間好似幾特別嘅刀削麵店（拾味正宗刀削麵館歌賦街分店）就嚟試下啦！見網上食評唔多，應該係新開冇耐，僅有嘅食評又好壞參半，但見價錢平平哋，又有自己鐘意食嘅麻辣菜式，試下都無妨～ 嗌咗個刀削麵底，加兩餸：麻辣金錢肚併麻辣牛展，同埋一杯凍朱古力。講講個麵底先，其實今次係我第一次食刀削麵，啲麵好厚身，都算幾彈牙，湯底清淡，就咁睇以為個份量唔多，點知可能係麵條粗厚嘅緣故，原來係幾多幾飽肚的😝 麻辣金錢肚同埋麻辣牛展有少少辣口，因為本身都算食得辣，如果可以再辣啲會更惹味！！而金錢肚切條大小適中，入口爽脆，所以口感好好。而牛展厚度適中，入口煙韌，啲餸嘅份量都好合理，以中環地段嚟講，$65食到一碗份量足，味道又中規中矩嘅特式粉麵算係咁啦。見有食評話佢啲麵痴住哂一舊舊⋯⋯可能係外賣爭啲，我堂食就冇呢個問題，條條麵都分明，湯底都好多，唔會浸到啲麵乾晒脹哂。題外話，有個幾搞笑嘅小插曲，話說叫咗杯凍朱古力，一飲落口鹹到我懷疑人生，心諗唔通係呢到嘅特色飲料！？但細細啖咁飲多幾啖之後，真係唔掂！可能係落錯咗鹽當糖