一於打包回家, 可以懶一日唔使煮~
呢度全店食物, 飲品都係「冇味精」添加
雞亦用無激素，無抗生素雞
可以單獨買雞或套餐跟飯
第一次黎買，唔熟架步、本身打算買飯，但原來有一人餐
叫左個一人餐，原來只包湯或飲品， 我又叫少左飲品，下次再黎我會識叫啦~
(我聽到D熟客落單，D雞仲可以加錢轉其他部位架)
除左海南雞，仲有豬手, 豬頸肉, 魚餅, 肉骨茶
本黎都想試埋肉骨茶，但太夜, 已賣哂, 唯有留番下次啦~
栢檔既食物全部分店現場鮮製，COUNTER 後面就係佢地既廚房~
餐廳只做外賣，不過都有一個小小的立食區
外賣包裝都幾整齊嚴實，飯同餸有分格分開
湯就好大兜，所以回家有少少漏，不過都可以接受的。
就連個甜品雪米滋都有紙杯裝住
一人套餐 $ 74
套餐包括 無味精靚湯或飲品
一個餸加飯 (飯可揀白飯或雞油香飯)
時菜/迷你雪米滋
呢個湯叫無味精靚湯，真係超級濃郁，起哂沙架~ 有好多南瓜蓉溶哂係湯度
湯仲有另一個選擇，可以轉肉骨茶湯 + 10 蚊
第一次黎，唔識轉，下次可以試下 ~
海南雞幾香，聞落有少少好似鹽焗雞既香料味~ 但食入口就無鹽焗味嘅~
雞皮幾爽脆，又無肥膏，雞肉熟度剛剛好，好嫩滑又唔會出哂血水個隻~
1
海南雞仲會跟埋醬料，有海南雞黑豉油，蔥蓉同酸辣醬
呢個「黑豉油」，曾經攞過意大利米蘭EXPO世博展覽會的世博大獎！唔怪得咁好味, 用黎沾雞同撈飯都一流
另外叫了一個豬頸肉飯 $56蚊 份量都幾大 ，豬頸肉有10塊以上，飯都好多
豬頸肉用滷水醃製，入味而不會死咸，烤得唔算燶，但肉質幾鬆化。
不過個飯就無乜汁，我當然用番海南雞既黑豉油啦~XD
原來呢度既飯有輕型份量 38蚊，啱哂細食人仕喎~
跟餐雪米滋幾有驚喜，綠茶皮加朱古力雪糕，幾好味~XD
呢度既小食唔算多，只有辣鳳爪和麻辣豬耳仔 (各26蚊)
麻辣豬耳仔 份量都幾多，成兜滿滿的，算係抵食
不過我麻麻鐘意呢種乾乾地既口感。
