雞吧

營業中

休息中

今日黎石門玩到黃昏時間，買啲野食加餸先。一期就見到呢間主打炸雞嘅外賣店。一於試下。炸雞都有好多口味，突然選擇困難症，將呢個重任交俾女女。半半炸雞L size $138
最後直接買大盒雙併，滿足貪心之人。小朋友揀左蜜糖牛油同車打芝士，每款有八件雞。雞新鮮炸起，脆卜卜，炸漿唔算多，最好係唔油膩，咬開中間肉質好滑，仲保持到肉汁。蜜糖果款蜜味好夠，脆皮吸收晒蜜糖，好夠甜。另一款係配上一大盒車打芝士醬，非常杰身嘅芝士醬，芝味極濃。
意式香草肉丸 $36x2
另外叫左兩份肉丸俾小朋友。十幾粒肉丸好澎湃。豬肉丸本身都好彈牙又有肉汁，醬汁係燒汁，小朋友都鍾意食。
雙色芋泥圓併地瓜球 $36
一盒有六大粒，粒粒都圓轆轆。外皮香脆，中間煙煙韌韌，包住甜甜嘅芋泥。另一款係一咬爆漿嘅地瓜球，蛋黃流沙唧晒出黎，有驚喜！
細細間店仔，充滿住炸雞嘅香味。拎到番屋企仲係新鮮熱辣，炸雞同兩款丸子都相當不錯，風味十足。今次石門一行有意外收穫。