今晚同朋友喺灣仔做完嘢，想搵間坐得舒服又有鑊氣嘅中菜館，最後揀咗呢間老字號「盛記酒家」。一入去就感受到嗰種傳統酒家嘅氣氛，燈光光猛，侍應姐姐雖然忙但手腳好快，沖茶遞水都好俐落。坐低叫咗壺茗茶（$15），香片夠滑唔會有澀味，暖暖胃先開始點菜。
既然嚟得食小炒，當然要叫啲考功夫嘅菜式。
首先上枱嘅係金薯牛柳粒（$168.0）。呢碟真係有驚喜，平時出面食牛柳粒好驚太多鬆肉粉味或者韌到咬唔開，但盛記處理得好好。牛柳粒切得大細適中，咬落去係真係有肉汁「爆」出嚟，肉質軟嫩得嚟仲保雷留咗牛肉嘅咬口。最搶鏡反而係啲「金薯」，即係薯粒，外層有一層薄薄嘅脆糖衣，食落去外脆內軟，薯仔嘅天然甜味同黑椒汁嘅鹹香牛肉形成強烈對比，鹹甜交織得好過癮，真係好送飯。
另一道係菜莆蠔仔煎蛋（例）（$148.0）。呢個煎蛋一上枱就聞到好香嘅蛋味同鑊氣。師傅火候控制得精準，蛋角邊位煎到「脆卜卜」，呈現金黃色嘅微焦狀態，但中間依然保持嫩滑。蠔仔份量都幾足，隻隻都飽滿冇縮水，咬落去係充滿海洋嘅鮮味。最妙係加咗菜莆，爽脆嘅口感令成個煎蛋昇華咗，每一啖都有脆、軟、嫩三種層次。
因為啲餸實在太好送飯，我哋一人叫咗碗白飯（$14@），啲米飯粒粒分明，撈埋牛柳粒啲汁真係一流。雖然兩個人叫兩樣餸，但份量實在太足，最後食唔晒要叫個外賣盒同環保袋打包返屋企做宵夜。
盛記依然保持住老牌酒家嘅水準，鑊氣夠，食材新鮮，雖然價錢唔係大排檔價位，但以咁嘅質素同灣仔地段嚟講，絕對係物有所值。
推介菜式： 金薯牛柳粒、菜莆蠔仔煎蛋
