玖零冰室

營業中

休息中

今朝一早連早餐都未食，就同阿仔趕去灣仔修頓球場交文件，比預期中快攪掂，時間11:15左右，仲趕得切食番個靚早餐。即刻行快啲兩步周圍揾下。然後見到呢間門面幾sharp 醒嘅冰室，白色主打，餐廳内有不同顏色的霓虹光管，裝修企理，一於就試吓。呢排特别想食沙爹牛麵，吾通係傳說中嘅報復式食沙爹牛麵？哈哈～ 見呢間冰室仲要係《特濃沙爹牛麵》（$38），配「3.6牛乳滑蛋併丹麥酥」吾使諗一定要試。果然沙爹牛汁特別濃郁，牛肉係爽口又唔靭嘅，而且分量頗多。沙爹牛迷嘅你一定要嚟試下。除了港式中餐，尚有歐陸式早餐，仲有全日早餐，阿仔就點了呢個。《玖零全日早餐》（$72）有西冷牛扒、炒滑蛋、紐倫堡香腸、蜜糖炒什菇、沙律、丹麥酥多士。西冷牛扒都大塊，味道不錯軟硬適中、沙律菜夠新鮮、紐倫堡腸好好味。除了早餐，午餐亦有很多選擇。阿仔青少年發育期，特別好胃口，所以忍唔住叫多個蕃茄湯底烏冬，順便當食埋午餐。呢個《牛魔皇蕃茄濃湯烏冬》（$58），有厚切牛舌三片，加好多鮮牛，稻庭烏冬，超多牛超滿足。試咗啖蕃茄湯，濃郁超多蕃茄肉，配埋烏冬，推介一試。