新記冰室

營業中

休息中

同同事係荃灣做野，忙到午餐時間都過左，唯有出去搵下午茶食下先。咁啱經過呢間冰室，竟然要等位喎，咁應該有返咁上下質素啦，一於唔好走雞，排隊試下先。好彩排左10分鐘就可以入座。排隊期間，睇定有咩好食，咁就可以一入座即order，唔洗等咁耐。同事話比較肚餓，叫左個芝士汁招牌豬頸肉加煙鴨胸通粉，同事見到都“嘩”左一聲，話估唔到咁大碗。芝士汁超級多，完全遮住通粉表面，畢起通粉，每粒都有芝士汁，非常濃郁。豬頸肉份量頗多，肉厚但唔會嚡口，好食。我就叫左下午茶，司華力腸煙鴨胸芝士麵。芝士汁同樣滿瀉，完全唔吝嗇。芝士麵口感煙韌，吸收哂芝士汁，特別好食。仲叫左個瑞士汁雞翼，有驚喜。估唔到個雞翼咁滑，唔似一般鹵水雞翼為左入味，煮到雞肉又老又嚡，呢個瑞士汁雞翼又入味又滑，雖然明明好飽，但都忍唔住口清左碟。跟餐有兩杯飲品，揀左凍西洋菜蜜同凍菊花露，冰多，夠哂涷，但味道就沖淡了，如果蜜味可以更濃，就更完美了。