媽咪雞蛋仔

營業中

休息中

媽咪雞蛋仔由紅磡黃埔街誕生，2014年喺銅鑼灣開第一間分店，連續六年獲得米芝蓮香港街頭小食推介，至今喺香港各區都有佢嘅蹤影，細細個開始食，好鍾意佢哋嘅原味，蛋香氣四溢，自己一個人都可以清晒且唔會覺得膩。隨着時代改變，佢哋亦加入唔同新口味，中秋節有白蓮蓉蛋黃月餅、萬聖節有楓糖南瓜同M&M、新年有蓮蓉煎堆同芝麻湯圓，而今次試咗冬日期間限定嘅紫薯番薯，咬開各佔半粒，香香甜甜，外層酥脆可口，內裏軟綿，令人越食越上癮。除咗雞蛋仔之外，佢哋亦有格仔餅同飲品供應，懷舊口味、創意沙冰、手調抹茶、清涼果香、甜蜜滋潤同咖啡系列。抹茶牛乳紅豆沙冰甜度適中，抹茶牛乳同紅豆嘅味唔會蓋過對方，沙冰嘅質感亦唔會覺得嚡身，夏天飲真係好解暑。