Peace Cafe (已結業)

我對尖沙咀樓上cafe唔係好熟，唔係特登搵都唔知，亦都少不免喺食物同服務質素方面將佢同旺角樓上cafe比較，所以我哋都冇咩期望，都係當支持吓黃店。上到去，老闆係叔叔（仲有個姨姨）好主動招待自己，我揀坐喺卡位，梳化有啲污糟，有少少扣分。而且中間位就搞緊活動，好似係放映會，成班人坐埋一張枱度，所以間cafe空間有少少窄，張枱本身冇擺menu，要特登行過去拎，有少少唔方便，menu有少少亂。上餐時間唔算快，不過見叔叔同姨姨嘅態度唔錯就體諒吓（嚟得cafe都唔會趕時間啦）我叫咗鯖魚蕃茄湯長通粉+蒜蓉多士，佢本身有埋沙律同一般嘢飲。蕃茄湯竟然唔係用罐頭湯，應該係自己整，唔會鹹。蜜糖咖啡應該用靚嘅蜜糖整，飲落都好有驚喜。整體食物就偏向清淡健康，好啱我呢種口味，最怕出街食食到成口都係味精，呢間就冇。另外冇加一服務費，100蚊內咁嘅質素已經好抵，仲要喺尖沙咀，改變咗我對尖沙咀食嘢一定好貴+樓上cafe一定唔好食同服務差嘅觀念。