終於開始有啲冬天嘅感覺，打邊爐就爽啦🤣上次食完隔離間燒鰻魚覺得好正，就去埋佢隔離試打邊爐！
環境
同隔離店其實都互通😂
餐牌
27
餐牌都係介紹刺身魚生，但我哋今日主攻火鍋！
海南椰子雞(半鍋) $168 
有好多款養生湯底，好似花膠、藥膳雞等等，我哋揀咗好耐無食嘅椰子雞，半鍋都好足料，本身鍋底有木耳、雲耳，加埋椰子好香甜，雞件另上，可以冷鍋就落，因為本身鍋底都好清甜，我哋就當佢係火鍋料咁邊食邊煮，雞件有用花雕、杞子醃過，肉質唔會嚡口。
特價台山桶蠔 $138 
1
呢個必點！$138 有成6-7件，仲要件件都大大件！最怕蠔煮完會大縮水，但呢隻台山桶蠔唔會點縮，而且飽港鮮甜，亦好襯椰子雞湯底，大推🧡
頂級安格斯牛肉（小碟） $178 
叫咗最平嘅牛肉，但都有驚喜，一嚟兩個人叫小碟其實都有接近十塊，每塊又開咗對半，所以一塊都幾大，唔係果啲爛茸茸牛肉貨色，牛味濃有口感無渣。
牛黃喉 $68
平時食嘅黃喉都係薄身，回彈似彈弓咁，呢到嘅牛黃喉厚切，一面較焾，另一面就較煙韌，未食過嘅質感😳 仲要一大片好有口感，超啱我口味！
生猛海中蝦 $148 
本身諗住叫平啲嘅普通海蝦，但賣哂，我哋又好鍾意打邊爐食蝦，貴少少就試呢一款，一上枱覺得無嗌錯，半透明狀隻隻都好靚仔。
蒙古羊肉卷 $98 
羊肉卷羶味一放湯湯鍋煮就湧出羊味，但食落嘅羶味無聞落去咁勁，油脂感亦唔重。
什菌野菜籃 $78 
有油麥菜、娃娃菜、雞脾菇、金菇菜、鴻喜菇，蔬菜類配清甜湯底一流。
