祥仔辣辣 (海運大廈) (已結業)

想食高級啲又坐得舒服嘅中餐，呢間祥仔辣辣絕對係好選擇。唔單只係尖沙咀海運大廈，好容易去，入到去仲有落地大玻璃窗，睇到維港景色。今日同好朋友專程嚟咗呢度試吓烤魚！率先上場嘅係咕嚕咕嚕元氣九宮格 。九種川式前菜，啱晒乜都想食下嘅我哋。而且份量都唔少，好抵食！然後就到主角：鴛鴦烤魚，一次過試兩隻味。食烤魚，梗係要食酸同辣味！我哋揀咗金波羅酸辣味同魔鬼地獄味。唔係好食得辣嘅我哋，揀咗小辣。兩邊湯底都好入味，而且條魚炸烤過，完全冇腥味，但係啲肉仲係保持到好嫩，又夠多肉，而且海鱸魚嘅骨都唔會太細條，啱哂想啖啖肉嘅我哋！除咗主菜食魚，我哋仲試咗三色墨魚三色滑 (半份) 。好彈牙，食得出好新鮮，睇得又食得。而雪花肥牛卷都好新鮮，睇嚟係新鮮刨出來見到隔籬枱都係點左勁量1.3公升特色飲品。我哋都唔執輸！我哋試咗自柑墮樂同埋藕遇熱情鳳梨。唔單止份量夠勁，仲好好味，解辣解膩一流。最後再嚟多一樣有有睇頭嘅咕嚕咕嚕圍爐肆甜。特別鍾意佢嘅焦糖糍粑，非常出色。而桂花冰粉淡淡桂花香，加埋爆醬粒粒，酸酸甜甜，為成餐畫上完美句號！