曼谷車站

營業中

休息中

曼谷車部個裝修好有特色，外表裝修到好似一架火車咁，入面環境舒適。餐牌選擇多，有好多傳統既泰國菜式：小食，沙律，海鮮，湯類，燒烤，肉類，咖喱，菜，粉麵飯，甜品同飲品，應有盡有，價錢亦唔貴。 泰式馬拉盞炒通菜 - 通菜夠嫩，炒得好香，每條通菜夠晒入味，好惹味。 冬陰公湯（小）- 隨爐一齊上，可以保持湯的熱度。雖然話係兩人份量，但其實唔只，而且好足料，材料有大蝦同各種菇菌類。冬陰公湯底味道濃郁，酸酸辣辣夠曬開胃。大蝦大大隻，夠曬鮮味。 泰式燒雞 (半隻) - 燒雞醃製拿捏得剛剛好，好入味，唔會嚡口或者鬆散，皮脆肉嫩，肉質有彈性又夠咬口。配埋酸甜醬，真係忍唔住一啖接一啖咁食。 香葉肉碎煎蛋飯 - 肉碎份量十足，而且炒得好香，咸香味十足，配埋隻荷包蛋，送飯一流。