入座/等位：打電話Book jor 七點，無限時。 座位唔算多，但都坐得滿 。
環境：好有氣氛感，電視同音樂都係播返啲經典外國MV歌曲。 店員都好熱情同親切，但又唔會太E令你有壓力， 都唔會催促你，或者hard sell你。 有種熟客感，雖然第一次黎。
食物： 好多選擇，佢仲有一啲新菜式寫係牆上黑板。（利申，唔記得影單，價錢可能有少少出入。）
10
泰式蟹肉炒飯，$108。 望落是未好普通，但入面係好真材實料，係見到成“條”蟹肉。 望落是未好淡咁，但味道係好入味！
上菜時店員仲俾埋魚露我地，驚我哋覺得唔夠味。但其實食落有驚喜！
炒金邊粉（大），$108。 好足份量嘅糖、辣粉同花生粉，哈哈。 好食，就算撈哂都唔會太重口味，蝦都新鮮。
生菜包，$88。 偏辣但惹味，欣賞佢豬肉唔會好油，亦都唔會好多汁，係真係包得好爽。
泰式拼盤，$158。正路美食，佢勝在唔太油。
明爐燒鰽魚，$148。 湯底係酸辣口味，魚肉都好嫩滑。
菠蘿沙冰，$30。 感覺普通，不過唔係一般人工死甜味。
燒豬頸肉，$82。 偏咸少少，但好食。 豬頸肉好少唔好食，所以放心叫黎食。
總結： 佢係無限時同埋店員都好親切，唔會有港式快啲落單或者快啲食完嘅壓力，值得同老best黎呢到聚一聚。
