金寶泰國菜館

營業中

休息中

路過九龍城點可以唔食泰國嘢，今次試咗🌸金寶泰國菜館🌸。佢隔離有另一間金寶越南餐廳，可以一次過食到泰國野同埋越南野。食泰國嘢就先一定要嗌啲泰式飲品，我哋兩個叫咗一個椰青同埋龍眼冰，泰國感覺即刻出曬嚟 。第一道菜上嘅係酸辣粉絲大蜆煲🍲， 湯底少少酸辣，加埋好重香茅同九層塔味道，勁開胃， 大蜆都夠曬鮮甜。因為朋友病咗所以只可以食啲清淡嘢，咁啱呢度可以嗌越南嘢食，佢就要咗一碗雞翼湯河(走埋䓤)，啱曬佢食。 我就要咗一個海鮮濕炒河🐟。雖然係濕炒河，但係師傅都炒到食落勁有鑊氣， 而且味道啱啱好唔會太鹹，醬汁亦都唔會太杰，yummy yummy😁。 我哋另外仲加咗個凍鮮蝦卷🍤。煙韌嘅粉皮包咗大大隻嘅蝦同粉絲，中間仲夾咗香葉，食落好清新，可以中和其他重口味嘅食物味道。 最後甜品要咗一件拉椰糕，煙煙韌韌甜度啱啱好，都係食泰國野必叫之選，為呢餐畫上完美句號😍。