一坐低就嗌咗招牌嘅「大漠燒羊肉串」，孜然粉好香，羊肉唔會太羶，啖啖肉好滿足。
跟住試咗燒雞翼同雞軟骨，雞翼燒到外皮脆卜卜，蜜糖味微微甜；雞軟骨就爽口彈牙，送啤酒一流。
至於北海道豚五花肉，真係無介紹錯！油脂分布勻循，燒完之後入口即化，甜甜哋又唔膩，好正。
蒜蓉粉絲大扇貝都好出色，扇貝肉厚，配埋滿滿嘅蒜蓉同吸盡鮮味嘅粉絲，食到舐舐脷。
仲有燒墨魚滑釀青椒同燒魷魚串，墨魚滑好彈牙，釀入青椒度幾有心思；魷魚串就燒得啱啱好，唔會韌。
最後嗌咗個蒜蓉燒茄子同兩杯特飲——水果茶同手打檸檬茶，果茶酸甜開胃，檸檬茶夠晒清新，解咗燒烤嘅油膩感。
整體嚟講，呢度食物款式多，價錢合理，環境又夠熱鬧，一定會再嚟幫襯！
