道頓堀御好燒專門店 (新城市廣場)

星期六悶悶地成個晏晝係屋企，老公提議夜晚出沙田行下~出到去6點幾剛好肚餓就去新城市搵野食醫肚先啦!上到最高果層都幾多餐廳，見到一間寧舍多人排隊~裝下原來係食DIY大阪燒既餐廳~見到幾得意於是又排下啦~拎左飛兜左一陣商場大概等多10分鐘就有位~第一次唔知咩好食就簡簡單單揀左個2人餐~有齊沙律、2個御好燒、燒帶子、燒牛肉、甜品同野飲~懶人推介唔駛諗~

1

好快沙律黎先~有點失望，個人覺得caesar salad既精髓在於上面既炸麵包粒，但呢碟沙律好多水，浸到d麵包粒淋哂~好失望!!

令人失望

之後廣島燒同道頓堀雜錦御好燒上檯，要自己落粉漿，落蛋落炒麵落配料~係個鐵板上面炒呀煎呀反呀~~製成品好衰但過程好爆笑好好玩~味道亦好好~用DIY呢個做賣點確係唔錯!

粉漿隔離果碗貌似脆卜卜既野淋哂

好足料好豐富!

要自己撈撈撈

個樣好衰😂不過咁先似DIY嘛!

之後係鐵板燒埋牛油帶子、燒牛肉，牛油帶子感覺新鮮但味道未見突出，燒牛肉則醃得好香，燒起上黎熱騰騰好滋味!

燒牛肉

燒牛油帶子

最後上埋甜品~係兩客雪糕。我地揀左柚子味同抹茶味~柚子味清新唔過甜，食完油膩野來一客柚子雪糕感覺好refresh~至於抹茶味同樣出色，抹茶味濃面不過苦，有回甘，相比之下我更愛抹茶味!

抹茶雪糕及柚子雪糕

埋單連加一4百幾，但以好玩度同味道及整體環境而言都物有所值既!不過要注意一點食完真係全身連頭髮都會一陣油煙味~所以唔好著d難洗既衫去食喇~

店內環境唔錯