Outback Steakhouse (尖沙咀中心) (已結業)

日期：7月12日人數：9人不知不覺，呢個西餐集團原來已經喺香港屹立左20年。第一次去食嗰陣已經覺得水準好唔錯，而每次去食都覺得味道好穩定，通常都會有好多人排隊，如果冇訂枱的話就點都要等位先入到去。今次就同一班朋友一共九個人去到尖東呢一間分店食晚飯。本身我哋係想去食斧頭扒餐，但係原來需要預訂，所以我哋只好改成散叫。我哋都叫咗唔少嘢食，當中包括招牌之一嘅炸洋蔥花球、羊架、Prime Ribeye 牛扒、雞肉、同埋Nachos。飲品方面，我就冇飲特飲，選擇咗凍檸茶，因為可以無限添飲。黑糖麵包啊唔該！呢句的確係大家點完菜之後必定會講嘅對白。黑糖麵包上枱嗰陣仲係熱辣辣，仲好軟熟，配上牛油非常Perfect。食完之後我地即刻再叫第二條，最後好似再加多咗一條。炸洋蔥花球又係一到好值得點嘅菜式。炸洋蔥配上特色嘅醬料，非常好味。如果佢嘅醬再俾多啲就好啦。羊架同牛扒都係水準之作，肉本身已經唔錯，所以無須技巧都好食。其他食物中規中矩。環境唔錯，坐得都算OK。服務尚算唔錯，反應都幾快。餐廳就喺尖東地鐵站附近，行五至8分鐘，位置尚算方便。價錢尚算合理。