吉列牛忌廉烏冬專門店 (百樂中心) (已結業)

相約左朋友食飯，係我地都無乜諗法食乜嘅時候，上網睇到其他人推薦呢間吉列牛，所以就決定去試下。我地大約夜晚8點去到，唔洗等位，order左一份吉列牛定食，一碗咖哩忌廉烏冬，同埋一份牛舌雞肉串。吉列牛定食入面包括左芝麻醬蕃茄仔，芝麻醬凍豆腐，麵豉湯，一碗米飯，同埋主角吉列牛，牛嘅表面炸得好脆，擺落石爐到再燒一燒，唔點醬食好有牛味都已經好好食，再點埋佢配嘅芥末醬又係另一種風味。咖喱忌廉雞肉烏冬一上枱見到成碗烏冬係一兜白色忌廉有啲嚇一嚇，以為會好膩，撈起之後其實只係面頭有一層薄薄嘅忌廉，裏面就係滿滿嘅咖喱汁，對於完全唔食得辣嘅我黎講，佢係無辣味嘅，反而係好香嘅咖喱味，配搭住忌廉撈匀食，岀乎意料地好食。牛舌雞肉串相反呢個牛舌雞肉串就失色少少，無乜點食到牛舌嘅味道，似普通雞肉串唔算太特別。總括黎講，佢兩樣招牌食品我都覺得值得一試，而我會再去食嘅。