今次我哋喺海鮮檔買咗普通Size既瀨尿蝦、花螺、兩隻龍蝦同一紮聖子。去到名門之後，我哋選擇咗蒜蓉粉絲蒸聖子、避風塘炒瀨尿蝦、上湯焗龍蝦，仲有辣酒煮花螺。除咗海鮮之外，我哋再叫咗半隻名門炸子雞同一鍋鹹魚雞粒炒飯。
成餐飯入面，最驚喜一定係上湯焗龍蝦，龍蝦好大隻，啖啖肉，新鮮得嚟又彈牙，仲整得好入味；蒜蓉粉絲蒸聖子亦都非常出色，聖子清理得好乾淨，冇沙，粉絲吸晒啲鮮味湯汁，非常滿足。辣酒煮花螺夠香夠辣，花螺新鮮彈牙；避風塘炒瀨尿蝦鑊氣十足，蒜香撲鼻，完全係經驗老到嘅師傅先整到呢個水準。鹹魚雞粒炒飯都唔輸蝕，一大鍋夠四個人分，炒得乾身香口，仲有焦香飯焦。
唯一稍為失色嘅就係嗰隻炸子雞，雖然皮脆肉嫩，但味道比較淡，調味唔夠重，似係簡單用少量鹽醃咗就炸，所以略為失色。不過講真，嚟呢度都係主打食海鮮，其他小炒都係陪襯，所以唔會太介意。
總括而言，四百幾蚊一位 ( 連買海鮮既錢）就可以食到咁多款高質海鮮，服務態度OK ，份量足夠飽肚又滿足，性價比真係高。相比起鯉魚門或者西貢，屯門三聖一帶真係數一數二。如果之後再有親戚朋友嚟香港，我一定會再帶佢哋嚟呢度食過癮！
