鳳城酒家 (已搬遷) 新店位置

這間老店唔係唔好，但只適宜久不久才光顧一次。原因是現在連菜牌也欠奉，只得那兩三張過膠單張，選擇真的非常非常有限。那些地道的招牌算做得唔錯：窩貼明蝦($108) ：蝦肉鮮夾爽，多士鬆脆香口，可惜一大碟只得十件，一個人都可以吃清。大良炒鮮奶：仍有水準，只是比以前份量略少。炸子雞：照例皮脆肉滑有雞味，鹹度適中。可能太搶手，每次點此菜均要追單追到一吐氣才上枱，要半隻又話要等有其他客要埋另一半才斬喎；今次要全隻又比鄰座的半隻遲了近半小時! 次次要攪到部長入廚房親自拿出來…野雞卷：唔怕油膩可以一試。燒腩仔: 出乎意料之外的好。义燒: 好惹味，肥瘦度適中。味道合格，但若叫人每次都只是圍繞呢幾度菜(最多加埋個炒桂魚、蜆芥鯪魚球、焗布甸)，幾好食都係假喇。