上海香港麵家

營業中

休息中

游完水出銅鑼灣搵食，星期六人山人海，媽咪未食過呢間栥飯！所以帶佢同豬表妹來食！難得係去到唔使等位！成日見全場爆滿嘅境況！我好少堂食，通常外賣個栥飯加熱豆漿返屋企同肥髀食！地方好普通小食店格局，木椅木枱，略殘舊，不算乾淨（碗仔有污跡，油淋淋），店面好繁忙，人來人往！叫咗:菜肉雲吞麵--四粒雲吞幾大粒，要分開幾啖食，皮滑溜煙韌，餡料菜多肉少，比例幾好，味道清爽！配幼麵，麵質一般，唔彈牙！湯底唔味精！份量分到四小碗都夠食！粢飯--粢飯上枱已經切開一半，用保鮮紙包住，好大碌，食半個已經好飽，餡料多，外層糯米軟糯，煙煙韌韌，肉鬆鬆身甜美，油炸鬼今次比較硬，炸菜偏咸！比較失色！豆沙鍋餅--上枱賣相好醜樣，炸到黑晒起泡泡！（我估係啲油問題）感覺好油膩，餡料豆沙份量多！熱辣辣，味道其實唔差！冷熱豆漿--正常好味，最重要凍豆漿夠凍，熱豆漿夠熱！（我知好似好廢話，但真係好多食店做唔到）今日服務值得一讚，因為平時店員多少有點愛理不理，今次個後生男店員好好禮貌，因為我舉手要落單時，佢招呼緊另一枱客，嗰枱客又好多嘢問，佢都有示意唔好意思等多陣！有覆單！上菜都好勤快！