Be Leaf (已結業)

呢排天氣悶熱，聽聞觀塘工商區開咗間幾靚嘅餐廳，我同媽咪一於去試吓佢。餐廳裝修好舒服，有泰國風情，一坐低心情已經好好。由於遲起身，我哋分別叫兩個set lunch。媽咪叫咗個香煎凡立貝日式咖哩意大利飯。媽咪係比較有要求，最初都擔心會唔會飯太硬、或者芝士味太濃唔啱口味。誰不知有驚喜，佢話咖哩汁啱啱好，唔會辣但又有香濃咖哩味，個飯軟硬適中，凡立貝香甜彈牙。我見佢成個飯清晒，一定好唔錯👍我叫咗個水牛芝士帕馬火腿蕃茄法式三文治，個portion 好大，啱晒未食早餐嘅我。水牛芝士滑得來有口感，加埋ham 嘅咸香，真係好芝味。個三文治跟埋個脆炸薯條，成個set 飽肚又豐富，好滿足😌店員好細心，知道媽咪有啲唔舒服介紹佢飲薑蜜紅茶。飲完佢喉嚨舒服晒。我就叫咗Grapefruit Summer Soda, 為呢個炎炎夏日降下溫，飲完feel到透心涼🥰