::: 手打牛肉漢堡包 + 薯餅 + 凍奶茶 ::: $25 + 2
手打牛肉漢堡其實都唔係咩新奇事, 呀菲都喺唔同地方食過好多次… 但對呢度嘅漢堡包仍然有期望, 可能因為真係想食好耐! 但係今次真係見到佢真身, 又反而有d失望…雖然芝麻包烘得頗香脆, 但一打開見到件手打牛肉就實在係好扣分!! 塊扒又薄又細又煎到黑晒… 仲有得少少生菜同埋唧得唔均勻嘅沙律醬… 個包都幾細, 味道亦只屬一般… 好食過佢的手打牛肉漢堡包真係大把!
薯餅兩塊, 炸得頗脆, 但同時亦都十分之油… 好似無索過油就拎出嚟咁!
凍奶茶亦都只係普通質素… 唔算好好飲囉.
2
::: 餐牛公仔麵 + 火腿奄列方包 + 凍奶茶 ::: $27 + $2
本身見到個湯底乜咁清嘅, 以為沙爹味唔夠, 原來個牛肉已經用沙爹醬醃過, 所以冇再加沙爹落湯度. 但係牛肉沙爹味唔係好夠, 而個公仔麵就唔夠味, 好清淡… 午餐肉正正常常, 煎過下咁, 不過好薄…
火腿奄列做得好求其, 個蛋都未炒勻, 蛋白蛋黃都仲係分開, 仲有d黑黑地嘅鑊燶… 火腿好少, 要叫佢做奄列有d勉強… 方包唔多講, 淡而無味.
其實呢條街已經被收購得七七八八, 舖頭只剩下零零落落嘅幾間… 摩登已經係最後一間開得最耐嘅茶記, 都唔忍心比個喊面佢… 但如此嘅食物水準, 試問又點比得落一個笑面呢?
