犇殿台灣火鍋 (德福廣場1期)

營業中

休息中

每次收工經過德福，都見到餐廳出面大排長龍，有好幾次拎完飛，都已經知道等到last order都食唔到，唯有放棄。難得今日6點零已經收工，即刻沖去試吓先！喺門口見到有幾高同價位嘅Menu，最後揀咗美國極黑牛三叉，有三款牛，食落正正常常，牛三叉好大塊，幾好味，有驚喜，其餘兩款不過不失啦！ 問職員有咩湯底推薦，佢話牛乳鍋同牛骨鍋都多人揀，我哋揀咗牛骨鍋，湯底都幾重藥膳味，我覺得還好，比較鍾意牛大人嘅牛骨湯多啲。配料都算出色，特別係手工餃大大粒，有雲耳鮮蝦好足料！滷肉飯都幾有誠意，肥肉炆得好入味好淋，直情入口即溶，同牛大人嗰種肉碎滷肉飯唔同風味！飲品同雪糕都係正常嘅貨色，唔多提。本身都幾鍾意Mr. Steak集團嘅餐廳，因為服務態度幾好，職員有提示湯底煲滾之後要轉4度火，上菜速度快，冇漏單，有次湯底開得太大火滾瀉，職員都主動過嚟幫我哋抹乾淨，整體服務良好。