咖吔

營業中

休息中

呢間餐廳，服務垃圾，食物欠佳，但係老闆應該係一個好人嚟（詳見下文）。事緣3月4日，同老婆兩個人嚟呢間餐廳食tea，由於肚餓，所以兩個人叫咗三個餐。個海南雞，雞冇雞味；個檳城蝦麵又係冇味冇道嘅，配料又少，得三粒蝦仔、幾片好薄嘅肉片同幾粒豆卜，同我喺檳城食嘅蝦麵味道真係爭好遠。服務方面真係完全垃圾。個海南雞飯，落單時已經講得好清楚，要白飯，點知上到嚟都係油飯，咁我就即刻同個侍應講要白飯啦，點知佢拎走碗油飯之後，等到我哋食完啲雞都未拎返碗白飯畀我哋，要我哋三催四請先有。最後叫嘢飲喇，我哋要一杯熱水，一杯凍話梅水，結果打錯單，變咗熱話梅水。其實轉返凍話梅水咁簡單嘅事，個侍應都唔明唔識處理，要佢另一位同事幫忙，仲問我哋係咪已經飲咗杯熱話梅水，真係畀佢哋激死！點解我話個老闆好人呢？因為而家呢個社會，好少老闆會想一啲經驗不足或者智商偏低嘅人造嘢嘅，但係呢間餐廳老闆請咗至少三四個呢類人，真係好心地。