八户屋和食料理

營業中

休息中

一向對日本餐廳都抱有期望，就算喺屯門都覺得要有應有嘅服務。呢間日本餐廳就連麥當勞嘅服務都及唔上，大家樂都比佢好。 第二次嚟食，兩次都預到差唔多嘅對待。第一次係落錯單，店員問：「啱唔啱食丫。」我哋話唔啱，隨後再嚟咗兩個人嚟，第一個想話我哋叫錯，第二個再問我哋啱唔啱食，嘥我哋時間。第二次，有個店員將張電腦單跌咗落個清酒煮蜆度，店員自己講「我換過個畀你」，兩秒鐘後就冇咗件事。諗住無所謂，少事繼續食。跟著店員嚟個壽司，未到枱已經跌晒，一粒喺豉油碟，一粒落咗我哋另一碟餸度。店員竟然想就咁就算，我地話你換過碟畀我地啦，佢竟然話都冇掂到冇跌落枱！最後要搵經理先肯換！員工做錯嘢其實好少事，迫客人硬食就唔得。講返食物質數，今次主要食壽司，其他食品試唔多。壽司：尚算ok, 如三文魚腩、蟹子。北寄貝及海膽唔新鮮，顏色暗啞。清酒煑蜆：蜆可以再大隻啲，少量有沙，有酒味。味道都ok。牛肉鍋番茄湯底：味道幾好，份量多。燒鯖魚：醬汁幾夾，味道正常，不過唔夠熱。炸芝士：夠熱，不過舊芝士完全唔好味，槳住個口又冇芝士味。以呢個食物質數個人認為可以平啲。不過最緊要都係要保持應有嘅服務水平。