煌府婚宴專門店

營業中

休息中

今日出尖沙咀準備去睇朋友註冊結婚，一落車就去新港中心借廁所用，另一個朋友見到呢度有間煌府就話時間咁早不如飲個茶先啦，於是乎就入左黎食下午茶。鮮蝦蟹粉石榴球一上枱就嘩一聲，好少可酒樓食點心會有咁精緻嘅點心，脆脆嘅外皮入面包住蟹粉同鮮蝦，係一款外表同味道都俱全嘅點心。羅漢齋煎脆面羅漢齋味道不過不失，但脆面就非常特別，可能係幼身面關係，所以油份炸得零舍通透，就算被汁浸晒都仍然食得出脆嘅口感。紫甘藍鮮蝦韮菜粿韮菜好多，味道調配適中。時菜鯪魚球打到起膠嘅鯪魚肉食落好彈牙，唔錯。蟲草花北菇綿花雞咁厚綿花嘅綿花雞真係未食過，呢度真係落足本。黑糖紅棗糕煙煙韌韌好有咬口，每一啖都有淡淡嘅棗味。蒜蓉芝士蝦春卷蝦膠好大舊，加埋芝士熱食無得彈。