想甜嚐甜

營業中

休息中

想做就做，想甜嚐甜。喺menu見到呢句真係好唏噓，生活很苦，間唔中真係需要吸收啲糖分，呢間良心店嘅甜品都唔係一般貨色，睇得出有認真設計，個心太軟真係幾高質，可惜黃大仙店近日結業，希望大家多多懲罰西環同大角咀店。🍽開心果心太軟配乳酪雪糕 ($62)呢度嘅心太軟有好多特別口味，早排有芫荽味添。心太軟即叫即焗，等候時間較長，但一切開見到咁流心就覺得值得。開心果味濃郁唔人工，非常出色，菠蘿乳酪雪糕則可一解甜膩，同開心果幾夾。🍽 紫 芭菲  ($48)本身想食紫薯燉蛋，但畀芭菲嘅賣相吸引左，芭菲鋪滿紫薯粒，幾鍾意佢紫薯無將壓成蓉，保留返原有質感。紫薯醬甜度就高少少，感覺加左花蜜，底層嘅粟米片同玄米粒依然脆身。唯一可挑剔嘅係當日乳酪雪糕只有菠蘿味，菠蘿雪糕味道清新，甜度偏低，可惜同紫薯唔算好夾。🍽 椰芋 ($40)一碗有齊芋圓、地瓜圓、紫薯圓、丸子、西米、紅豆同海底椰，非常足料，三色圓幾彈牙，味道就唔算好突出，椰汁唔會太稀太杰。🍵玄•抹茶 ($32)面頭嘅鮮奶泡幾綿密，睇顔色仲以為抹茶做主角，點知玄米味好突出，杯底有玄米胚芽、小丸子同紅豆蓉，整體唔錯，店員好好幫我地盡量少甜。